Saxwɛgbe na yi ŋukɔn lo do wezɔn na mi nɔ le dogba etɔn ji. Le dogba xe la ji, mi na kpɔn wema winwlanye do saxwɛgbe mɛ, a bo xlɛ wema xeni lɔ oxo sɔn saxwɛnuye we akɔtanu ɖeye wu.

Ogbɛta Saxwɛgbe Na Yi Ŋukɔn:

Ogbɛta Saxwɛgbe na yi ŋukɔn, nyi xɔsetɔye we ŋukɔn yiyi we ogbɛta ɖe, xe we afɔ na ye sɔ ɖote le otɔsun oxwe 2013 gɔ mɛ. Odan xe we ogbe ni nya nɔ, wɛ nyi tun e na tɛnkpɔn na saxwɛgbe a yi ŋukɔn, a bo na na saxwɛgbe can a ɖo kpinkpɛn etɔn le ogbe gbokpweye mɛ. Odan xeye ni sɔ ɖo ote na wasi ye xɛn:

• E na trɔ wlan Biblu   do saxwɛgbe mɛ, a bo trɔ wlan wema xeni lɔ oxo do Biblu wu ye can do saxwɛgbe mɛ. Xeye ni nyi : oxolilɔ sɔn biblu wu we wemaye, sɔnlin dido na ɛmɛ we wemaye.
• E na wlan, a bo jla wema xeni nyi xɔsetɔye tɔn ( Biblu we akpa ɖeye, onu xeni jɔ le oto mɛ nɔ ye, kanŋutataye, agban alo oyɛ ɖiɖexlɛye...)
• E na wlan, a bo jla oto na yi ŋukɔn we wemaye xeni lɔ oxo sɔn ogle lilɛ, ozan ninɔ, suklu yiyi  kpo akɔtanu wiwaye wu.
• E na gɔ alɔ na saxwɛgbe kpinkplan we wema winwlanye.
• E na hun saxwɛgbe we sukluye do cɔcixweye, kpodo otogun vovwe ye mɛ, le saxwɛ kansin la mɛ.
• E na kpedo ɛmɛ xeye ni nɔ xlɛ, bo nɔ wlan flasegbeye wu, na yee can, a do nyɔ saxwɛgbe winwlan kpodo xixlɛ.
• E na wasi onu do kinkan, le ogbeye we omɔnu, onunyinywɛ sɔn ɛgbɛtɔ wu we omɔnu, kpodo akɔtanuye we omɔnu le saxwɛ kansinmɛ.

Ahɔnkan alo odanwaxwe, ogbɛta la tɔn le Adrɔmɛ, Gbɛkɔn xeni le Duntun we ototahɔnnu mɛ, le xweyɔgbe we otomimavi mɛ.

Alokan: (00229) 97 06 47 81 /97 58 97 76 /95 95 37 64/95 50 99 03

Email: bible.en.saxwe@gmail.com

Facebook Bible Saxwe